Ministru Edukasaun, Juventude no Desportu Dr. Armindo Maia, entrega kadeira 200 ne’ebé mak prepara husi estudante sira iha Eskola Téknika Vokasionál-Grupu Teknolojia no Industria (ESTV-GTI) Bekora, ba diretór edukasaun munisípiu Dili, hodi distribui ba eskola hirak-ne’ebé kadeira ho meza sei sufisiente hela.
Kinta-Feira semana ne’e, Ministru Edukasaun ho nia komitiva hala’o vizita ba eskola ESTV-GTI Bekora, hodi haree kadeira sira-ne’ebé halo husi estudante sira. Kadeira hirak-ne’e estudante sira husi departamentu mekánika produsaun mak halo.
Iha serimónia ida-ne’e Ministru Edukasaun Dr. Armindo Maia informa, nia hakarak to’o iha eskola refere tanba serimónia ida-ne’e importante. “Durante ne’e ESTV-GTI hetan benefisiáriu barak husi governu no parseria sira hanesan KOICA, no agora ESTV-GTI bele prodús ona buat balun”. Ministru Edukasaun mós hatutan kadeira hirak-ne’ebé hadi’a husi ESTV-GTI Bekora, sei distribui fali ba Eskola Sekundária Jerál (ESG) sira iha Dili laran.
Alende ne’e, Diretór eskola ESTV-GTI Bekora, Sr. Fransisco Guterres hateten, VII Governu Konstituisionál loke tan pájina foun iha ESTV-GTI Bekora, liuhusi prezensa Ministru Edukasaun nian. Nia Salienta liután katak, eskola refere hetan oportunidade husi MEJD ho nia ligasaun tomak, ofisilamente hola parte iha eskola refere hodi halo serimónia entrega mobiliarius ka kadeira sira-ne’ebé estudante sira husi departamentu Mekánika Produsaun halo.
Iha oportunidade ida-ne’e responsável ba departamentu Mekánika Produsaun Sr. Raimundo da C. Guterres, esklarese kadeira 200 ne’e mai husi ESG sira ho kondisaun ne’ebé ladi’ak maibé liuhusi departamentu mekánika produsaun, sira bele modifika fali kadeira hirak-ne’e sai di’ak hodi oferese fali ba eskola sira iha Dili laran.
Hafoin ne’e, ofisialmente Diretór eskola ESTV-GTI Bekora entrega kadeira ba Ministru Edukasaun no Ministru Edukasaun entrega fali kadeira ne’e ba diretór edukasaun munisípiu Dili hodi distribui ba ESG sira iha Díli.
Iha Serimónia ne’e estudante sira husi ESTV-GTI Bekora, simu Ministru Edukasaun ho tara tais no basa liman, hodi akompaña Ministru Edukasaun ba fatin serimónia. Iha ESTV-GTI Bekora, mestre permanente sira hamutuk 64, kontratadu sira 21, voluntáriu 11 no totál estudante 1516, kompostu husi departamentu hotu ne’ebé hola parte ba ESTV-GTI Bekora.